Rozpšawa: Rěcne planowanje a rěcna politika we Walesu

Wót sociolinguistiskeje situacije waliziskeje rěcy jo 5. junija w Budyšynje powědał dr. Hywel Lewis, dłujke lěta koordinator za wěcejrěcnosć pśi uniwersiśe Trinity Saint David we Walesu. Dr. Lewis jo wuzwignuł, kak wažna jo strategija, ako zapśimjejo wšykne wobłuki rěcnego planowanja. Wón jo pódšmarnuł, až njejo móžno, taku strategiju wuźěłaś a wósebnje z wuspěchom implementěrowaś, mimo togo, aby dojšło ku konfliktam. Dłujkocasne cele za rewitalizěrowanje dejali se drje wustajiś, ale proces samy móžo se samo pśi nejlěpšem planowanju dla młogich pódlańskich efektow jano we wjelgin wobgranicowanej měrje top-down abo bottom-up wjasć.

W diskusiji jo se pokazało, až centralne cele (na pś. dobywanje nowych powědarjow) mógu byś jadnake, až pak napšawy njedaju se jaden do jaden wót jadneje mjeńšyny pśenjasć na drugu. Źo wó to, indiwiduelne rozwězanja za rewitalizěrowanje serbskeju rěcowu na městnje wuwiś. Tak ako pla Walizarjow dejało se pśi tom teke we Łužycy ze wšakimi měnjenjami a zajmami skobodnje a konstruktiwnje wobchadaś.

Na pśednosk kazali stej wótźělenje za regionalne wuwiśe a šćit mjeńšynow a Institut za sorabistiku uniwersity w Lipsku, kótaryž jo wugótował tyźeń europskich mjeńšynowych rěcow.

Rozpšawa Susanny Vogeloweje.