Dwa nowej zešywka rěda “Sorabistiske źěłowe papjery” Serbskego instituta stej wujšłej
Pśed krotkim jo wudał Serbski institut dwa dalšnej zešywka w swójom rěźe “Sorabistiske źěłowe papjery”. W zešywku nr. 5 dokumentěrujo dr. Jean-Rémi Carbonneau nadrobnje fachowe zejźenje wó mjeńšynowych rěcach w Francojskej a pśedstajijo pódobnosći k situaciji w serbskej Łužycy. W zešywku nr. 6 zaběra se dr. Lutz Laschewski z kubłańskim monitoring za serbsku rěcnu wucbu w Bramborskej.
We zešywku 5 dokumentěrujo dr. Jean-Rémi Carbonneau nadrobnje pśinoski fachowego zejźenja SI wó mjeńšynowych rěcach w Francojskej (Chóśebuz, nowember 2022). Carbonneau wopisujo reziliencu a rewitalizaciju okcitańskeje rěcy, rěcnu politiku bretonšćiny a šanse a wupominanja korsiskeje rěcy. Awtor pśirownujo situaciju tych tśich rěcow z wuwiśim dolnoserbšćiny. Paralele a kontrasty mjazy mjeńšynowymi rěcami w Francojskej a dolnoserbšćinje su teke temy podiumoweje diskusije. “Tekst Carbonneaua njejo jano późiwanja gódne a kompetentne pśirownanje wuwiśa tych tśich francojskich mjeńšynowych rěcow, ale jomu se raźiju teke pśirownanja k aktualnym pšašanjam a debatam w serbskem konteksće”, tak dr. Lutz Laschewski, wjednik wótźělenja za regionalne wuwiśe a šćit mjeńšynow.
W zešywku 6 pśepytujo a komentěrujo awtor dr. Lutz Laschewski kubłańske statistiske zestajenja datow k wobźělenju na serbskej wucbje w Bramborskej. Kótare dopóznaśa mógu se zdobyś z toś tych datow za rěcne planowanje? Kótare pšašanja nastanu pśez toś te daty? Kótare datowe proznotki wobstoje? Wušej togo naraźijo Laschewski system indikatorow za dalej wuwity monitoring. Eksploratiwnu analyzu rozmějo awtor ako prědnu kšaceń k detailěrowanemu kubłańskemu monitoring za serbsku rěcnu wucbu. “Ale to, což taka rěcna wucba w swójom aktualnem stawje wugbajo, njebuźo kwantitatiwnje dosegaś, dolnoserbske rěcne zgromaźeństwo do pśichoda zachowaś “, Lutz Laschewski na kóńcu reziměrujo.
We rěźe Sorabistiske źěłowe papjery wuchadaju w njepšawidłownych interwalach źěła a rozpšawy, ako su nastali wětšy źěł w projektach Serbskego instituta. Jadna se wó poziciske abo konceptowe papjery, dokumentacije (na pś. nejlěpšych praktikow) a wó pódobne teksty z běžnego źěła.
- Carbonneau, J.-R. (2024). Minderheitensprachen in Frankreich. Strategien und Hindernisse der Sprachplanung und Revitalisierung in Okzitanien, der Bretagne und auf Korsika. Budyšin: Serbski institut (= Sorabistiske źěłowe papjery, zešywk 5).
- Laschewski, L. (2024). Sorbischer/Wendischer Sprachunterricht in Brandenburg. Eine explorative Analyse und Kommentierung bildungsstatistischer Daten. Budyšin: Serbski institut (= Sorabistiske źěłowe papjery, zešywk 6).