Drogowańska wustajeńca w Žytawje: “Lichota kiwa! Serby a mjeńšynowe pšašanje pó 1918”
termin: 11.09.2023 - 30.11.2023
Městno zarědowanja: Wusoka šula Žytawa/Zgórjelc, Theodor-Körnerowa aleja 8, 02763 Žytawa, Dom Pětra Dietricha (Peter-Dietrich-Haus), foyer
Serby su narodna mjeńšyna bźez swójskego stata. Jich sedleński rum jo Łužyca, region w krotkem zajtšu Bramborskeje a źěły pódzajtšneje Sakskeje, w direktnem susedstwje a z wuskimi póśěgami do Českeje a Pólskeje.
Pominanja za awtonomiju a narodneju njewótwisnosću mjazy Serbami wót 19. stolěśa pśiběraju. “Lichota kiwa” se groni naźeje połnje na zachopjeńku
1919, gaž se europska kórta pó kóńcu Prědneje swětoweje wójny wótnowotki rědujo.
Drogowańska wustajeńca Serbskego instituta “Lichota kiwa! Serby a mjeńšynowe pšašanje pó 1918” pśedstajijo cas rozkwiśenja serbskich narodnych procowanjow mjazy swětowyma wójnoma. Pśi tom wustupujuce pšašanja za kolektiwnym samopóstajenim, za tolerancu a wurownanju zajmow mjazy mjeńšynu a wětšynu su až do źinsajšnego aktualne.
Wustajeńca jo se spěchowała wót Ministaŕstwa za wědomnosć, slěźenje a kulturu kraja Bramborska, Sakskego statnego kněžaŕstwa, Nimsko-českego fondsa za pśichod / Čěsko-německý fonds budoucnosti a wót Załožby za serbski lud, kótaraž dostawa lětnje pódpěru z dankowych srědkow na zakłaźe góspodaŕskich planow, wobzamknjonych wót Zwězkowego sejma, Krajnego sejma Bramborskeje a Sakskego krajnego sejma.