DNA – nowy slěd słowjańskeje zachadnosći Bramborskeje
termin: 22.05.2025 19:00 zeger
Městno zarědowanja: Serbski muzej, Młyńska droga 12, 03046 Chóśebuz
Kak stawiznarje, archeologi a genetikarje gromaźe źěłaju, aby wěcej zgónili wót srjejźowěka w regionje
W 12. a 13. stolěśu jo se w regionje mjaz srjejźnym Łobjom a Odru, pótakem w źinsajšnej Bramborskej a Barlinju, wšo kradu pśeměniło: Ze stron, ako su měli spócetnje półobskosłowjańske wobydlaŕstwo z pśewažnje tatańskeju nabóžninu, jo malsnje wordowała nimski powědajuca a kśesćijańska Marka Bramborska. Pśi tom su grali pśidrogowanje, rodowanje a twaŕ městow wjeliku rolu. Dajo pak lěbdycka spušćabne pisne žrědła wó tom, kak su se te procese wótměwali. Rowno tak jo mało wót togo znate, kak jo półobskosłowjańska towarišnosć była natwarjona. Teke archeologiske a mjenjowědne zwěsćenja mógu k tomu jano we wobgranicowanej měrje něco groniś.
W slědnych lětach su se w pśirodowědach wuwijali metody k analyzy stareje DNA. Te bituju móžnosći dojś k nowym dopóznaśam, pśeto mógu se pśeslěźowaś namakane śěła z togo casa. Take analyze su zrazom wósebne wupominanje glědajucy na zgromadne źěło bejnje wšakich wědomnostnych disciplinow. Deje źe se garantěrowaś fachowje korektne a spušćabne interpretacije tych namakankow.
W lěśe 2022 su se zwězali slěźaŕki a slěźarje z pólow archeologije, genetiki a stawiznow, aby tu wjeliku transformaciju regiona lěpjej wurozměli. Z interdisciplinarnym pśedewześim kśě dobyś nowe dopóznaśa k migraciji a demografiji w Bramborskej a Barlinju we wusokem srjejźowěku. Pódla su mjaz drugim Institut Maxa Plancka za ewolucionarnu antropologiju w Lipsku, Uniwersita w Kölnje, Charité – uniwerzitna medicina w Barlinju a Akademija wědomnosćow Barliń-Bramborska. Fokus lažy pśi tom na wšakich rownišćach w měsćańskich sedlišćach wobeju zwězkoweju krajowu.
Dr. Jörg Feuchter jo historikaŕ pśi Akademiji wědomnosćow Barliń-Bramborska. Wón jo jaden z wjednikow slěźaŕskego projekta »Migracija a měsćańska demografija w Barlinju a Bramborskej we wusokem srjejźowěku«. To źěło wón w pśednosku pśedstajijo. W lěśe 2023 jo gromaźe z Claudiju M. Melischoweju a Ines Garlischoweju spisał knigły »Prědne Barlinarje. Žywjenje pśi Sprjewi mjazy 1150 a 1300« (Die ersten Berliner. Leben an der Spree zwischen 1150 und 1300; nakładnistwo BeBra).
Linki k dalšnym informacijam:
