Internetowy bok wó dolnoserbskem pšawopisu a źěłabnosći Dolnoserbskeje rěcneje komisije

Hynac ako górnoserbšćina njama dolnoserbšćina pšawopisny słownik. W źěłowej praksy Dolnoserbskeje rěcneje komisije (DSRK), kótaruž koordiněrujo južo žedne lěta Serbski institut (Chóśebuska wótnožka, Fabian Kaulfürst), stej se wujawiłej dwa problema: K prědnemu su pšawopisne regule jano w njedosegajucej měrje znate. K orientaciji słužytej drje na jadnom boce Dolnoserbsko-nimski słownik M. Starosty (1999) a DNW, śišćane knigły pšawidłow (Niedersorbische Orthographie und Interpunktion. Regeln ) wót M. Starosty pak su južo lěta dłujko zrozpśedawane. K drugemu jo było běžne źěło DSRK w zjawnosći mało prezentne a wobzamknjenja komisije njejsu byli niźi koherentnje pśedstajone. Zaprědka jo było wótmyslone, wózjawiś wobzamknjenja komisije slědnych lět zwenka źěłowego plana („pśipódla“) same za se. To pak njejo było praktikabelne, wósebnje dla notnego spleśenja z płaśecymi pšawidłami. Togodla jo se dejał zrownju zakładny spis regulow redakcionelnje pśeźěłaś a wótnowotki wózjawiś.
Pódla redakcionelnego a techniskego pśigótowanja relewantnych wobzamknjenjow komisije jo se pśewjadła retrodigitalizacija górjejce pomjenjonych regulowych knigłow, daty su se techniski a redakcionelnje wobźěłali. (Bliše informacije wó tom se namakaju na internetowem boce.) Wušej togo su se wobzamknjenja komisije a spis płaśecych pšawidłow systematiski spletali a pó źělach z wujasnjujucymi komentarami wudopołnjowali. Wobzamknjenja DSRK su se pśistupnili tematiski a chronologiski rědowane. – F. Kaulfürst jo był zagronity wósebnje za wopśimjeśowu redakciju, M. Szczepański za wobźěłanje datow a programěrowanje internetowych bokow. Źěła na dwójorěcnem (dolnoserbsko-nimskem) internetowem boce su byli kóńc 2014 do dalokeje měry wótzamknjone. Wózjawił jo se bok kóńc februara 2015 pśez rěcny portal Chóśebuskeje wótnožki pód adresu dolnoserbski.de/dsrk.