104. Serbske blido

termin: 29.01.2025 17:00 zeger

Městno zarědowanja: Serbski muzej, Młyńska droga 12, 03046 Cottbus/Chóśebuz

Serbski muzej pśepšosyjo na rozgrono wó aktualnych a wšednych pšašanjach w serbskej Łužycy a zwenka njeje.

tema: „Jo dalej za tebje! Dolnoserbske rěcne planowanje 10 lět pó ,jo!zatebje’”

Rozgrono z Mětom Nowakom, dr. Anastasiju Kostiučenko a Sophie Rädeloweju wó źěłabnosći a wuslědkach akcije „jo!zatebje”, kótaruž jo w lěśe 2014 Rěcny Centrum WITAJ zachopił, a wó aktualnych perspektiwach za wuwijanje dolnoserbskeje rěcneje strategije. Wšykne tśi su wědomnostne sobuźěłaśerje w Serbskem instituśe, we wótźělenju regionalne wuwiśe a šćit mjeńšynow, a słušaju do projektowego teama k wuwijanju dolnoserbskeje rěcneje strategije. Politiski wědomnostnik Měto Nowak jo dłujkolětny iniciator a koordinator wót “jo!zatebje”.

W nowemberje 2014 jo Rěcny Centrum WITAJ zachopił organizěrowaś zjawne diskusije k pśichoźe našeje dolnoserbskeje rěcy pód motom “jo!zatebje”. Cel jo był rěcne planowanje iniciěrowaś. Wót 2015 jo serbska akciska seś to dalej wjadła. Pśez zwězkowe srědki k strukturnej změnje we Łužycy se wót 2022 spěchujo mj. dr. projekt za wuwijanje serbskeje rěcneje strategije (až do 2027 w nosaŕstwje Serbskego Instituta).

Wšykne něgajšne sobustatkujuce a Wše zajmowane luźe su wutšobnje pśepšosone.