Fabian Kaulfürst pśewzejo k 1. januaru wjednistwo rěcywědnego wótźělenja pśi Serbskem instituśe
Kuratorium Serbskego instituta jo na swójom pósejźenju slědny tyźeń w Budyšynje pśigłosył naraźenju komisije za wobsajźenje městna, až pśewzejo sorabist dr. Fabian Kaulfürst wót 1. januara 2024 wjednistwo rěcywědnego wótźělenja.
Pó pśisamem dwěma lětźasetkoma ako wjednik wótźělenja pśepowdajo direktor Serbskego instituta (SI), prof. dr. Hauke Bartels, toś tu funkciju něnto zastupjarjeju młodšeje generacije: Wót 1. januara 2024 buźo dr. Fabian Kaulfürst wjasć rěcywědne wótźělenje w Chóśebuzu a Budyšynje. Fabian Kaulfürst źěła juž 20 lět w SI: nejpjerwjej ako doktorand, wót 2008 ako wědomnostny sobuźěłaśeŕ Chóśebuskeje wótnožki. “Z dr. Kaulfürstom pówjeźo wósebnje dokradnje wukubłany sorabist rěcywědnu źěłabnosć na wobyma stojnišćoma instituta. Wědomnostne źěło, ako jo dotychměst wugbał, se šyroko pśipóznawa, rowno tak jogo nabejne znajobnosći rěcy, wjeleraki kulturelny angažement a dobre kontakty pó wšej Łužycy. Wótźělenje jo toś w dobryma rukoma”, tak Hauke Bartels.
Fabian Kaulfürst jo studěrował sorabistiku, politologiju a nabóžninsku wědomnosć w Lipsku. Swój studium jo zakóńcył 2004 z magisterskim źěłom “Studije k rěcy Kita Fryca Stempla”, kótarež jo se 2005 wózjawiło w Małem rěźe Serbskego instituta. 2010 jo na uniwersiśe w Lipsku promowěrował wó temje “Studije k rěcy Michała Frencela”, źěło jo se 2012 śišćało w Spisach Serbskego instituta. Wót togo casa jo se Fabian Kaulfürst zabrał mj. dr. z leksikografiju, korpusoweju linguistiku, dialektologiju, frazeologiju a fonetiku/fonologiju. Wušej togo statkujo w rěcnem póraźowanju a nawjedujo južo bejnych lět lěśojski kurs za serbsku rěc a kulturu, ako wótměwa se kužde druge lěto. Wón jo cłonk górno- a dolnoserbskeje rěcneje komisije a powědaŕ slědneje.
Hauke Bartels jo 2004 nejpjerwjej pśewzeł koordinaciju, lěto pózdźej pón oficielnje wjednistwo tencasnego wótźělenja za dolnoserbske slěźenja w Chóśebuzu. Pó fuziji wótźělenjow w lětoma 2014/15 jo wordował wumjenjony za wjednika rěcywědnego wótźělenja na wobyma stojnišćoma. 2015/16 jo dodatnje pśewzeł direktorat, 2022 jo był pówołany za profesora drježdźańskeje TU. – Ako rěcywědnik buźo se Hauke Bartels – pódla wuwucowanja na uniwersiśe – dalej staraś wó pó móžnosći wobšyrnu dokumentaciju dolnoserbšćiny.
