Pśednosk (5.10.): Na žanry bazěrujuca wucby a curriculum design w „Multilterationies framework“. perspektiwy za zdźaržanje a rěcnodidaktiske pósrědnjanje serbskich rěcow
Městno zarědowanja: Wótźělenje za regionalne wuwiśe a mjeńšynowy šćit, Pśi Grodowej cerkwi 2, D-03046 Chóśebuz
Pśednosojucej:
Dr. Emily Barthold (BTU Chóśebuz-Zły Komorow), dr. Willi Wolfgang Barthold (TU Drježdźany)
Emily Barthold jo w Dolnej Łužycy ako wuměłcowka (Siggiko) znata, kótaraž se gromaźe ze swójim cłowjekom dr. Wilom Wolfgangom Bartholdom wjelgin za serbsku kulturu angažěrujo. Mjenjej znate jo, až stej se na Georgetown uniwersiśe we Washingtonje DC, USA, promowěrowałej a se wósebnje w cuzorěcnej didaktice kwalificěrowałej.
Dr. Emily Barthold źěła aktualnje w Rěcnem centrumje BTU Chóśebuz-Zły Komorow we wobłuku “Nimšćina ako cuza rěc”. Dr. Wili Wolfgang Barthold jo wědomnostny sobuźěłaśeŕ w katedrje “Pódwjacornosłowjańska literarna a kulturna wědomnosć” TU Drježdźany. Z toś tym pśednoskom stajatej wobej prědny raz swóje fachowe kompetence a ideje w serbskem (praksowem) konteksće k diskusiji.
Ku pśednoskoju:
Pśednosk co pokazaś, kak móžo eficientne pósrědnjanje serbskich rěcow dorosćonym wuknjecym z pomocu inowatiwnego curriculuma k rewitalizaciji rěcy pśinosowaś. Wón zawjeźo pśi tom do zakładow žanry– a literacy-bazěrowaneje rěcneje didaktiki a pśedstaja z pomocu pśikłada praksy konkretne wucbne metody a wugótowańske principy za wucbne materialije, kótarež mógu byś za wuźěłanje wósebnym pótrjebam serbskich rěcow pśiměrjonego curriculuma směrdajuce.
Zarědowanje wótźělenja regionalne wuwiśe a mjeńšynowy šćit (RegMje) Serbskego instituta. Jadna se wó prědny pśednosk w rěźe “Regmje pśepšosyjo” wótźělenja na nowem stojnišću. W njepšawidłownych wótstawkach se pśedstajaju a pśepowědaju zajmne temy.