„Varnsdorfske case“. Česko-serbski šulski projekt pó drugej swětowej wójnje 1945–1950

Wót kóńca 1945 su dostali źiśi z Górneje Łužyce šulske kubłanje až k abiturje w Českosłowakskej, a to w Českej Lipje, Varnsdorfje a Liberecu. W cełku jo jich zazdaśim było 800. Wětšyna jo 1949 do Łužyce slědk pśišła, slědne gymnasiasty lěto pózdźej. Mjazy ceptarjami su byli teke wěcej ako źaseś z Łužyce, wšykne wjelgin nazgónite we wuwucowanju. Tak su wukniki a wuknice nic jano dobre wukubłanje, ale teke česku, serbsku a dalšne rěcy nawuknuli. To jo jim wěstu lěpšynu pśinjasło, ako su zasej do Łužyce slědk pśišli a se nadalej wukubłali. Wjele z nich su nowu elitu mjazy Serbami twórili. Dopomnjeńska kultura tomu wóznamoju akle pó politiskem pśewrośenju 1989/90 półnje wótpowědujo.