Wjacsławk, Jakub (1885–1951)

Jatzwauk, Jacob

* 15. 2. 1885 Hórki / Horka
† 3. 9. 1951 Budyšin / Bautzen

Slawist, wědomostny bibliotekar, dr. phil., załožer Serbskeje bibliografije.

1907–10 studij teologije, filozofije a slawistiki w Praze, po zakónčenju teologiskich eksaminow 1910–12 dalši studij stawiznow a germanistiki w Lipsku; 1913–45 bibliotekar w Drježdźanach, na kóncu jako bibliotekski rada při Sakskej krajnej bibliotece, 1945–49 nawoda bibliotekarstwa a archiwnistwa w Budyšinje, 1949–51 nawoda Sakskeho krajneho archiwa w Budyšinje.
Jeho promocija 1912 přepytowaše zamóženske poměry města Budyšin na spočatku 15. lětstotka, z tym zahaji serbske socialnohistoriske slědźenje. Jako bibliotekar wuda „Sächsische Bibliographie“ (1919–1932 w 5 zwjazkach), kotruž wot 2. zwjazka sam wobstaraše. Zwonka powołanskeho skutkowanja nasta „Wendische (Sorbische) Bibliographie“ (Leipzig 1929, Bautzen/Budyšin 1952). Po 1945 bě předsyda Maćicy Serbskeje. Wón měješe bytostny podźěl na załoženju Instituta za serbski ludospyt w Budyšinje a Serbskeho instituta při Lipsčanskej uniwersiće.

DALŠE WOZJ.: „Siedlungsgeschichtlicher und sozialpolitischer Beitrag zur ältesten Geschichte des wendischen Volkes“ – Oberlausitzer Heimat, Görlitz 1920, str. 115-120; „Katalog serbskeho wotdźěla knihownje Maćicy Serbskeje“ – Časopis Maćicy Serbskeje 76 (1923), str. 55-199; „Serbsko-łužiska kniha a serbsko-łužiske knihownistwo“ – Knižní kultura doby staré i nové, Praha 1926, str. 28-34;

ŽÓ./LIT.: O. Wićaz, Jakob Jatzwauk. Wendische Bibliographie – Zeitschrift für slavische Philologie 7 (1930), str. 515-528; M. Reuther, Nekrolog – Zentralblatt für Bibliothekswesen (1951), 11/12, str. 407-415; H. Pohrt, Zur Herausgabe und Aufnahme der Wendischen (Sorbischen) Bibliographie von J. Jatzwauk (1928–1932) – Lětopis A 23 (1976) 2, str. 228-235

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984