Smoler, Marko (1857–1941)

Schmaler, Marko

* 21. 12. 1857 Židow / Seidau (Bautzen)
† 11. 4. 1941 Budyšin / Budyšin

Redaktor Serbskich Nowin, narodny prócowar.

Měšćanska preparanda a gymnazij w Budyšinje, wot 1877 načolnik ćišćernje w Budyšinje, 1884–1937 redaktor a wudawar Serbskich Nowin; syn Jana Arnošta Smolerja.
S. bě sobustaw towarstwa Lubin, 1875 sobuzałožer schadźowankow, 1880 sobuzałožer a 1892–1937 rewizor Towarstwa pomocy za studowacych Serbow, 1888 sobuzałožer a sobustaw burskeho towarstwa w Chrósćicach, pismawjedźer burskeho towarstwa w Małym Wjelkowje a Budyskeje Bjesady, 1920 hromadźe z H. Šlecu a Janom Skalu sobuzałožer Serbskeho sokołskeho zwjazka. W jeho nakładnistwje wuchadźachu nimale wšě serbske nowiny a časopisy, z pjenježnymi woporami je wudał šulske a cyrkwinske kaž tež dźěćace knihi.
Bě wot 1879 čłon a wot 1923 čestny sobustaw Maćicy Serbskeje, wjele lět je w předsydstwje sobu dźěłał, dale běše tež čestny sobustaw Maticy Srpskeje w Novym Sadźe.

ŽÓ./LIT.: J. Słodeńk, K sydomdźesatninam weterana serbskeho nowinarstwa – Serbske Nowiny 86, 296, 21. 12. 1927; Hłowny redaktor Marko Smoler pjećasydomdźesatnik – Serbske Nowiny 91, 298, 21. 12. 1932; J. Cyž, Wuběrny nowinar a wojowar za prawa serbskeho luda – Nowa Doba 5, 42, 12. 5. 1951; ts.. K 100. narodninam Marka Smolerja – Rozhlad 7 (1957), 12, str. 373-376

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984