Simon, Arnošt (1905–1974)

Simon, Ernst

* 2. 4. 1905 Zubornica / Groß Saubernitz
† 18. 12. 1974 Budyšin / Bautzen

Knihiwjazar, ludowy spisowaćel, narodny prócowar.
1923–33 knihiwjazar w Smolerjec knihićišćerni w Budyšinje, 1933–45 tobakowy klamar w tehdyšim Serbskim domje w Budyšinje, wot 1945 pokładnik a kartajnik Domowiny, 1947 sobuzałožer serbskeje ćišćernje a nakładnistwa, hač do 1963 nawoda Serbskeje kniharnje, 1963 na wuměnk. S. běše horliwy prócowar w narodnym a kulturnym dźěle a wuběrny znajer serbskeho pismowstwa a literatury druhich ludow. 1933 zakazachu jemu fašisća dalšu dźěławosć w serbskej ćišćerni jako „politisce njespušćomnemu“. Załoži sej na to wobchodźik z tobakowymi tworami.
S. wozjewješe mnoho literarnych přinoškow we wšelakich serbskich publikacijach, wosebje pak w Protyce.

WOZJ.: „Zapis serbskeje literatury“, Budyšin 1953; „Powěsće ze stareho dobreho časa“, Budyšin 1983

ŽÓ./LIT.: M. Nowak-Njechorński, Arnošt Simon – 65 lět – Nowa doba 24, 79, 4.4.1970, Předźenak; J. Cyž, Nekrolog – Rozhlad 25 (1975), 2, str. 79-80

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984