Rostok, Michał (1821–1893)
Rostock, Michael
* 21. 4. 1821 Bělšecy / Ebendörfel
† 17. 9. 1893 Huska / Gaußig
Wučer, přirodospytnik.
1837–41 Krajnostawski wučerski seminar w Budyšinje; 1841–44 pomocny wučer w Hodźiju, 1844–84 wučer w Drječinje, 1884 na wuměnk a přesydlenje do Huski.
R. wěnowaše so cyłe žiwjenje studijej rostlin a překasancow. Wozjewi cyłkownje 68 wědomostnych
dźěłow w serbskej a 11 w němskej rěči, wosebje we Łužičanu, Łužicy, Časopisu Maćicy Serbskeje a Berliner Entomologische Zeitschrift. W nich so zaběra z geologiskimi, mineralogiskimi, fyzikaliskimi a astronomiskimi prašenjemi runje tak kaž z botaniskimi a coologiskimi. Wosebite připóznaće we wědomosći namakachu jeho slědźenja na polu entomologije; korespondowaše z wuznamnymi wědomostnikami swojeho časa. 1871 přepoda Maćicy Serbskej wobšěrny manuskript „Dospołny serbski přirodopis“, wot kotrehož so jenož dźěle wozjewichu. Dale zawostaji šěsć sylnych zwjazkow w rukopisu, mj. dr. terminologiske słowniki přirodowědy, zběrki k botanice (Kwětnica), geologiji, ornitologiji, entomologiji a toponomastice. Ze swojej prócu wo tworjenju serbskeje fachoweje terminologije zdoby sej R. wulke zasłužby za dalewuwiće serbskeje spisowneje rěče. Pisaše tež hódne nastawki ludowědneho razu („Žiwjenje w lěsach“, Časopis Maćicy Serbskeje 1856/57; „Pichow“, Łužičan 1861; „Počasy“, Łužičan 1864–72).
Bě wot 1847 čłon Maćicy Serbskeje, spěchowaše wosebje dźěło jeje přirodospytneho wotrjada.
DALŠE WOZJ.: „Pokazki ze serbskeho rostlinopisa“ – Časopis Maćicy Serbskeje 1(1848), str. 149-178, 205-217; „Chemiske wurazy“ – Časopis Maćicy Serbskeje 18(1865), str. 319-336; 20 (1867), str. 605-609; „Krystalowe zastawy“ – Časopis Maćicy Serbskeje 21 (1868), str. 75-83; „Ptaki“ – Časopis Maćicy Serbskeje 26 (1873), str. 10-23, 82-101; „Mjetele“ – Časopis Maćicy Serbskeje 28 (1874), str. 98-116; „Najwužitniši přećeljo ratarstwa a hajnistwa mjez zwěrjatami“, Budyšin 1866 (přeł.); „Neuroptera Germanici – Die Netzflügler Deutschlands“, Zwickau 1888; „Planerogamenflora von Bautzen und Umgebung“, Bautzen 1889
ŽÓ./LIT.: M. Hórnik, Nekrolog – Časopis Maćicy Serbskeje 47 (1894), str. 58-61; O. Wićaz, Michał Rostok – přirodowědnik, spisowaćel, słownikar – Łužica 45 (1930), str. 42-44, 51-53, 60-62; Th. Schütze, Der Lausitzer Forscher Michael Rostock – Natura Lusatica I(1953). str. 21-30
Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984