Neumann, Awgust (1884–1963)

Neumann, August

* 26. 4. 1884 Raduš / Raddusch
† 10. 6. 1963 Wětošow / Vetschau

Překupc, zběraćel starožitnosćow, spěchowar Serbstwa.

1890–98 ludowa šula w Radušu; 1898–1904 pomha nanej we wobchodźe, 1904–06 we wójsku a 1907–22 powołanski wojak, 1922–29 statne zarjadnistwo w Berlinje, tam 1924 wyši knježerstwowy sekretar, 1929–56 překupc we Wětošowje, 1956 na wuměnk, wobstara hišće někotre lěta knihiwjednistwo prodrustwa we Wětošowje.
Po zasydlenju we Wětošowje 1929 započa pilnje w Maśicy Serbskej skutkować a pomhaše při organizowanju jubilejneho swjedźenja 1930. Za swój wobchod wabješe z najwšelakorišimi serbskimi motiwami. N. wustupowaše jako składnostny basnik a dopisowaše do Serbskeho Casnika a do Pratyje.

ŽÓ./LIT.: F. Mětšk, Volkskundliches im Nachlaß des Vetschauer Kaufmanns August Neumann – Lětopis C 9 (1966), str. 113-124

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984