Młóńk, Pětr (1805–1887)

Müller, Peter

tež: Młónk, Pětr abo Młynk, Pětr

* 19. 3. 1805 Žičeń / Seitschen
† 6. 2. 1887 Mała Boršć / Kleinförstchen

Roboćan, ćěsla a chěžkar, popularny ludowy basnik.

Syn roboćanskeho žiwnosćerja a ćěsle; do 1818 z chwilemi šula w Hodźiju, słužba pola burow, 1821 kupi jemu nan mału žiwnosć w Dźiwoćicach, 1822 jeho woženi, zo njetrjebał syn do wojakow, 1825–33 po zawjedźenju powšitkowneje wojerskeje słužby w Sakskej wojak w Drježdźanach, po tym chodźeše na robotu abo k buram na dźěło, 1844–47 dźěłaćer na twarje Zhorjelsko-Drježdźanskeje železnicy, wjesnjanosta w Dźiwoćicach, 1867 na wuměnk.
Hižo jako wojak na straži a jako dźěłaćer při twarje železnicy M. basnješe, wosebje swětne basnje, kotrež pak pozdźišo spali. 1848 prošeše J. A. Smoler, kotryž basniski dar M. spózna, jeho wo sobudźěło za Tydźenske Nowiny. Ludźo sej bórze pola M. składnostne basnje k swójbnym podawkam skazachu. M. zbasni něhdźe tysac pěsnjow, předewšěm kěrluše powšitkowno-nabožneho wobsaha, po formje a wobsahu pod wliwom ewangelskich spěwarskich. Bě w ludźe jara woblubowany a přiklad za wjetšinu serbskich ludowych basnikow po nim.
1848 bě zapisowar Serbskeho towarstwa w Třoch Hwězdach; 1862 załoži zhromadnje z J. H. Imišom Serbske ewangelske knihowe towarstwo, w kotrymž jako zapisowar hač do swojeje smjerće skutkowaše. 1876 jeho za čestneho sobustawa Maćicy Serbskeje wuzwolichu.

WOZJ.: „Dar poslednjeho zeleneho štwórtka za lube serbske mótki“, Budyšin 1866, 1884; „Kěrluše a spěwy“, Budyšin 1879; „Swětło, prawda, swobodnosć“, Budyšin 1963, str. 74-79, 86-87, 132-133

ŽÓ./LIT.: P. Křižan, Pětr Młóńk – Předźenak 1912, str. 28-32

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984