Měrćink, Jurij (1914–1988)

rodź. 20.5.1914 w Drježdźanach, zemr. 14.3.1988
wotrostł w Chelnje, katolska natwarna šula w Budyšinje, tam 1933 matura, štyri lěta studij na filozofiskej fakulće Praskeje uniwersity, tam dwě lěće předsyda serbskeho studentskeho towarstwa „Serbowka. W awgusće 1937 jeho na němsko-čěskosłowakskej hranicy zajachu, na to jastwo a wot 1940-1945 KZ Sachsenhausen.
1945/46 1. sekretar Domowiny, potom na dalše studije do Prahi, rjadowaše tam tež serbske wusyłanje, wudawaše „Serbske nowiny“, bě 1948 jednaćel Domowiny w CŚR.
W lěće 1949 wutwori w Budyšinje Serbsku ludowu uniwersitu z rěčnymi kursami po cyłych Hornich Serbach a z třomi internatnymi šulemi a nawjedowaše ju jako wučer. Pozdźišo skutkowaše jako docent a wotrjadnik w Serbskim wučerskim wustawje a jeho Pedagogiskim instituće, zarjadowaše listowy studij serbšćiny za wučerjow a wudawaše 20 zešiwkow wučbnych materialijow. Posledni lětdźesatk skutkowaše jako wědomostny sobudźěłaćer w Instituće za serbski ludospyt na němsko-hornjoserbskim słowniku.
Won napisa knihu „Hdyž čerty ćěkaja … (1961), wšelake powědančka, metodiske a rěčespytne dźěła za listowy studij serbšćiny, přełoži Juliusa Fučikowu „Reportažu pod šibjeńcu napisanu (1954) a wšelake stawizniske wučbnicy. Won bě nošer medalje „Za wobdźělenje na spjećowanskim boju čěskeho ludu 1939 do 1945“ a Pestalozzioweje medalje. (Franc Rajš)

Knjeni Angela Stachowa přepoda 1988 tute materialije ze zawostajenstwa swojeho nana Jurja Měrćinka do Serbskeho kulturneho archiwa.