Krygar, Arnošt (1847–1923)

Krüger, Ernst

* 18. 8. 1847 Poršicy / Purschwitz
† 24. 12. 1923 Budyšin / Bautzen

Farar, spisaćel, zběraćel serbskich knihow.

1857–67 gymnazij w Budyšinje, 1867–70 studij teologije w Lipsku; 1870–73 domjacy wučer w Ronneburgu, 1874–77 wučer na Krajnostawskim wučerskim seminarje w Budyšinje, 1877–1880 diakon a serbski prědar w Kamjencu, 1880–86 farar w Budyšinku a 1886–1914 w Poršicach, 1914 na wuměnk, přesydlenje do Budyšina; syn Hendricha Awgusta Krygarja.
K. pokročowaše po swojim nanje w slědźenjach k serbskim kěrlušam a dozhotowi krótko do swojeje smjerće k ewangelskim spěwarskim wot 1838 wjele stow stron wobšěrnu „Serbsku kěrlušowu konkordancu abo klučik serbskim spěwarskim“. Dale rozmnoži wón zapisk serbskich prajidmow swojeho nana, hromadźeše serbske modlitwy a zawostaji nahladnu zběrku swojich prědowanjow. 1891–93 redigowaše K. zhromadnje z Michałom Domašku Misionski Posoł.
Bě wot 1889 čłon Maćicy Serbskeje.

ŽÓ./LIT.: O. Wićaz, Nekrolog – Časopis Maćicy Serbskeje 77 (1924), str. 138-140; ts., Arnošta Krygarjowa konkordanca ewangelskich serbskich spěwarskich – Časopis Maćicy Serbskeje 88 (1935), str. 52-60

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984