Krawčik, Alwin (1899–1969)

Krautschick, Alwin

* 19. 5. 1889 Drježdźany / Dresden
† 20. 7. 1969 Budyšin / Bautzen

Dźěłaćer, małoratar, sobuzałožer Łužiskeho burskeho zwjazka, antifašist.
Syn serbskeje słužowneje w Drježdźanach; wotrosće pola dźěda a wowki we Wulkich Ždźarach, 1904–09 wotročk a pozdźišo dźěłaćer w metalurgiskej fabrice we Westfalskej, 1909–26 ratarski dźěłaćer a žiwnosćer we Wulkich Ždźarach, 1926–28 redaktor w Budyšinje, 1928–40 dźěłaćer w brunicowni Böhlen pola Lipska, 1940–45 antifašistiskeho skutkowanja dla w chłostarni Waldheim zajaty, 1946–59 přistajeny w Budyšinje. W samostudiju přiswoji sej K. šěroku wědu a wjacore słowjanske rěče. Čile w pruskej Hornjej Łužicy w serbskich towarstwach dźěłaše. 1926 załoži sobu Łužiski burski zwjazk a bě 1926–27 hłowny redaktor jeho nowiny Lausitzer Bauernbund. W februarje 1927 bu K. čłon předsydstwa Cyłostatneho kongresa dźěławych Němskeje. K. přisłušeše Serbskej ludowej stronje a skutkowaše na lěwym křidle zjednoćenstwa Němske měrowe towarstwo a w Lize za čłowječe prawa.

ŽÓ./LIT.: M. Kasper, Nekrolog – Rozhlad 19 (1969), 9, str. 347-348; L. Budarjowa/A. Frencl, Alwin Krawčik. Žiwjenje a skutkowanje serbskeho prócowarja, Budyšin 1976

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984