Karnauke, Kurt (1866–1944)

serbsce tež: Karnawka, Kurt

* 29. 4. 1866 Choćebuz / Cottbus
† 18. 4. 1944 Grodk / Spremberg

Lěkar, spisowaćel, komponist.

1886–89 studij mediciny w Mnichowje; 1889–1896 asistentny lěkar we Wienje a Berlinje, 1896–1944 lěkar w Grodku. 1896 rozkori so K. ze swojimi wulkobyrgarskimi přiwuznymi, kiž su 1886 załožili swětoznatu firmu C. Karnauke Söhne – Tuchfabrik Cottbus, a zasydli so do Grodka. Hižo w Mnichowje je so K. kubłał priwatnje w předmjetomaj klawěr a kompozicija. Rozumješe serbski a sej swój narodny pochad wulce wažeše. Přewažna ličba jeho knihow (awtobiografiske romany, pućowanske rozprawy, kriminalne powědančka a dr.) a kompozicije (wosom operow, komorna a zabawna hudźba, chóry a dr.) wuńdźechu w samonakładźe w Choćebuzu a pozdźišo w Lipsku.
Za serbski ludospyt je zajimawe titulne powědančko knihi „Der Wendenbauer“ (Cottbus 1933). Z jeho hudźbneje tworjawosće su wuchowane „Wendische Tänze (Serbske reje) für Pianoforte“ (Cottbus 1900), „Im Spreewald! Kleine Suite für Orchester“ (klawěrny wućah, bjez lěta), spěwohra „Die Macht der Liebe“ (Der letzte Wendenkönig) (1910–11) a awtobiografiska opera „Der Spielmann“ (bjez lěta).

ŽÓ./LIT.: J. Raupp: Kurt Karnauke (1866–1944) im Blickfeld der sorbischen Kulturgeschichte – Lětopis C 17 (1974), str. 51-69

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984