Jordan, Hendrich (1841–1910) & Hajno (1882–1917)

Jordan, Heinrich (sen.)

* 20. 2. 1841 Čelno / Tzschelln
† 3. 3. 1910 Popojce / Papitz

Wučer, spisowaćel, narodny prócowar.

Syn wučerja, nan Hajna Jordana a Karla Jordana; 1855–58 wučerska preparanda w Bórkhamorje, 1858–
1861 wučerski seminar w Bolesławju; 1861–63 wučer we Łazu a Ćikecach, 1863–72 w Hermanecach/Sprjewja, 1873–1910 w Popojcach.
W nadawku pruskeho stata wudawaše 1864 knihu „Serbskoněmska prěnja čitanka za srjedźne klasy“ a 1870 wučbnicu „Wjetša čitanka za młodych a starych“.
Horliwje staraše so wo wuwiwanje delnjoserbskeje literatury. Pisaše sam 16 knihow a pomhaše při
wudawanju dalšich dźewjeć. Při tym płaćeše jeho wosebita starosć wučbnicam a spěwnikam. Přełožowaše Zejlerjowe basnje a spěwy do delnjoserbšćiny. 1880–85 redigowaše hromadźe z M. Hórnikom Pratyju a 1881–85 bě soburedaktor Bramborskich Nowin. Wulku iniciatiwu wuwiwaše při wutworjenju a skutkowanju Maśicy Serbskeje a wosta faktisce z jeje wodźićelom, wukonjejo funkciju pismawjedźerja. Bě wot 1866 tohorunja čłon Maćicy Serbskeje.

DALŠE WOZJ.: „Prjedne źaseś lět Maśicy Serbskeje w Dolnej Łužycy“, Worjejce 1891; „Nowe a stare serbske arije za dwe głosa“, Budyšyn 1900; „Drobjeńce ze serbskeje historije“, Worjejce 1905

ŽÓ./LIT.: G. Šwjela, Nekrolog – Časopis Maćicy Serbskeje 64 (1911), str. 144-147; Mětšk, Chrestomatija, II, str. 81-92

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984

Inventar »

Jordan, Heinrich (jun.)

* 24. 11. 1882 Popojce / Papitz
† 28. 3. 1917 Villers devant le Tour

Wučer, mjenowědnik, kulturny prócowar.

Syn Hendricha Jordana, bratr Korle Jordana; gymnazij w Choćebuzu, 1901–04 wučerski seminar w Starej Darbni; 1904–13 wučer w Gołbinje a 1913–16 w Slepom, 1916–17 wojak.
J. wuznamjeni so jako zběraćel-mjenowědnik. Wozjewi zběrce „Ležownostne mjena Choćebuskeho wokrjesa“ (Časopis Maćicy Serbskeje 1913) a „Dozběrka k ležownostnym mjenam Grodkowskeho wokrjesa“ (Časopis Maćicy Serbskeje 1913). W Starej Darbni bě čłon serbskeho towarstwa, 1910 wuzwolichu jeho po smjerći jeho nana na předsydu Błótowskeho wučerskeho towarstwa, w Maśicy Serbskej wukonješe funkciju pismawjedźerja a pokładnika.

ŽÓ./LIT.: M. Handrik, Nekrolog – Časopis Maćicy Serbskeje 70 (1917), str. 65-67

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984