Janak, Korla (1891–1968)

Jannack, Karl

* 23. 1. 1891 Chelno / Cölln
† 27. 5. 1968 Chelno / Cölln

Syn ratarskeje dźěłaćerki; pućowacy rjemjeslnik; 1914–1918 wojak, 1918–22 w Bremenje, 1922–29 we wšelakich funkcijach Komunistiskeje strony w nowinach a nakładnistwach w Berlinje, Düsseldorfje, Essenje a Remscheidźe; 1929 instruktor Mjezynarodneje dźěłaćerskeje pomocy w Praze, 1929–30 referent při eksekutiwje Mjezynarodneje organizacije pomocy dźěłaćerjam w Moskwje, 1930–33 zamołwity sekretar Čerwjeneje pomocy za Delnju Porynsku w Düsseldorfje, 1934–40 mějićel płokarnje w Sarrebourgu, 1940 interněrowany, 1941–45 we jastwje a w koncentraciskim lěhwje Buchenwald, 1945–46 wokrjesny radźićel za nutřkowne naležnosće w Budyšinje, apryl–december 1946 předsyda Wobwodneho předsydstwa Zjednoćeneje socialistiskeje strony Němskeje, wobwod Łužica, 1947–49 naměstnik wokrjesneho radźićela, pozdźišo we wšelakich funkcijach w Domowinje, w Serbskim zarjedźe ludoweho kubłanja, na Centralnej serbskej rěčnej šuli w Minakale a druhdźe.
1914 zastupi J. do Socialdemokratiskeje strony Němskeje. 1918 załoži sobu Bremensku republiku radow a bě w jeje knježerstwje ludowy społnomócnjeny. Wón wobdźěli so na załoženskim kongresu Komunistiskeje strony Němskeje. Hač do 1922 bě J. sekretar sewjerozapadneho wobwoda w komunistiskej stronje a zapósłanc Bremenskeho parlamenta. W nalěću 1919 zasudźi J., přebywajo we Łužicy, raznje nacionalizm a separatistiske zjawy w serbskim narodnym hibanju a so za leninski program při rozrisanju narodneho prašenja zasadźi. Po 1933 bě wot fašistow přesćěhany. 1945 nawjedowaše J. přewjedźenje rólneje reformy w Budyskim wokrjesu. Zasadźowaše so wosebje za schwalenje wosebiteho Zakonja za zachowanje prawow serbskeje ludnosće (1948). Swoje dopomnjenki wozjewi pod titulom „My z čerwjenej naliku“ (Budyšin 1959) a „W pazorach fašizma“ (Budyšin 1963).

DALŠE WOZJ.: „Die Bodenreform im Kreise Bautzen“. Veteranenbericht – Lětopis B 7 (1960), str. 199-214 ŽÓ./LIT.: H. Brüchner, Korla Janak. Žiwjenje a skutkowanje wojowarja dźěłaćerskeho hibanja, Budyšin 1970

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984