Handrik, Matej (1864–1946)

Handrick, Matthäus

* 5. 4. 1864 Jamno / Jahmen
† 6. 2. 1946 Erdeborn

Farar, serbowědnik, narodny prócowar.

Syn srjedźneho bura; gymnazij w Bolesławju, w Budyšinje a 1883–86 w Kamjenicy, 1886–89 studij teologije a slawistiki pola A. Leskiena w Lipsku a we Wrótsławju; 1890–92 pomocny prědar w Budestecach, zmandźeli so z dźowku J. H. Mrózaka, 1892–1934 farar w Slepom, wuměnk w Drježdźanach.
H. zdoby sej wulke zasłužby wo zachowanje serbskosće w Slepjanskej wosadźe. 1892 załoži tam serbske burske towarstwo a bě jeho předsyda.
Cyły rjad popularnowědnych a wědomostnych nastawkow je H. do serbskich časopisow a nowinow podał. Wosebity wuznam maja jeho slědźenja wo Nepili (Časopis Maćicy Serbskeje 1896–1900) a jeho sydlišćowědne a onomastiske studije, kotrychž dla bu wot fašistiskeje wyšnosće přesćěhany a nućeny po emeritaciji Slepo wopušćić. Wjetši dźěl jeho njewozjewjenych rukopisow so při zbombardowanju Drježdźan zniči. Bě wot 1886 čłon Maćicy Serbskeje.

WOZJ.: „Dodawk k serbskej statistice“ – Časopis Maćicy Serbskeje 56 (1903), str. 45-46; 57 (1904), str. 45-47; „Slěpjanska swaŕba“ – Časopis Maćicy Serbskeje 54 (1901), str. 18-37; „Wšelake wašnja a přiwěrki ze Slepjanskeje wosady“ – Časopis Maćicy Serbskeje 54 (1901), str. 109-125; „Prašenja wo hrodźišćach“ – Časopis Maćicy Serbskeje 61 (1908), str. 131-133; „Započatki Serbow we Łužicy“ – Časopis Maćicy Serbskeje 89 (1936), str. 40-64

ŽÓ./LIT.: O. Wićaz, Farar Matej Handrik-Slepjanski – Łužica 46 (1931), str. 18-20; Serbske Nowiny 1934, 78

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984