Fritsche, Helmut (1907–1964)

Fritsche, Helmut

serbsce tež: Fryča, Helmut

* 1. 4. 1907 Wehrsdorf
† 20. 7. 1964 Budyšin / Bautzen

Wučer, hudźbnik, komponist.

1920–28 Wyša realna šula w Budyšinje, 1928–33 studij hudźbnych wědomosćow a germanistiki a runočasnje wopyt konserwatorija w Lipsku; 1933–34 referendar na Krajnostawskej wyšej šuli w Budyšinje, 1934 pomjenowanje na studijneho asesora, 1935–39 tam pomocny wučer na techniskej a powołanskej šuli města, 1939–41 wučer za hudźbu w Kleinmachnowje, 1941–45 we Wittenbergu, 1946–51 priwatny wučer za hudźbu a swobodnje skutkowacy wuměłc w Budyšinje, 1950 tam docent při wokrjesnej ludowej uniwersiće, 1951–61 wučer za klawěr na hudźbnej šuli a zdobom 1952–64 chórowy pedagog, dirigent a hudźbny dramaturg w Serbskim ludowym ansamblu w Budyšinje.
F. zaběraše so wědomostnje ze serbskej ludowej hudźbu, zinstrumentowa za sinfoniski orchester oratorijej Žně a Nazyma a uwertiru za oratorij Serbski kwas K. A. Kocora a komponowaše hudźbu ze serbskej tematiku. 1962–64 běše dirigent chóra Lipa. F. bu 1962 z Mytom Ćišinskeho počesćeny.

ŽÓ./LIT.: Nekrolog – Nowa doba 18, 75, 31. 3. 1964; M. N.-N. Nekrolog – Rozhlad 14 (1964), 5, str. 153; J. Rawp, Serbska hudźba, Budyšin 1978, str. 95

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984